Avertura d'unviern dil pass Lucmagn

L'uniun Pro Lucmagn s'engascha per in menaschi segir e senza incaps dalla via dil pass Lucmagn duront igl unviern. S'informei cheu davart las relaziuns da via e d'ulteriuras activitads da noss'uniun!

Andament per arver e serrar il pass

Il survetsch da segirtad dalla Pro Lucmagn (mintgamai ina persuna dalla vart dil nord e dil sid incl. substitut) giudichescha mintga di - resp. sch’ei fa da basegns pliras gadas il di - il stan dalla via e la situaziun da lavinas sil tschancun denter Fuorns e Campra. Sche la via vegn giudicada per segira resta la via aviarta. Sche la via vegn considerada per buca segira sto la via vegnir serrada. Mintgamai tenor situaziun vegn ei priu mesiras per megliurar il stan dalla via (rumida da neiv, dustar cuflaus, cumbatter glatsch etc.) ni ei vegn priu mesiras per neutralisar la situaziun da lavinas (rumper ora artificialmein lavinas). Sch’igl ei reussiu cun success da rumper ora las lavinas sa la via puspei vegnir aviarta. Per cass che la segirtad dils utilisaders dalla via sa buca vegnir garantida sto la via restar serrada. Motivs per serrar la via san esser: prighel da lavinas, gronds cuflaus, glatsch sin via, ina visibladad nunsufficienta (oravontut duront la notg) etc.. Medemamein resta la via serrada duront ch’ei vegn siglientau per rumper ora aschia lavinas.

Las decisiuns vegnan pridas mintga di cuort avon las 08.00h resp. en cass da basegns controllai ed adattai duront il di.

Nies survetsch da sms ni dad e-mail informescha Vus davart ils temps d’avertura (annunzia sut «Infoservice»).

Ei vegn applicau las suandontas uras d’avertura:

  • Aviert 24 h
  • Aviert dallas 08.00h-18.00h (savens duront igl unviern ault)
  • Aviert dallas 19.00h/21.00h tochen las 11.00h (savens la primavera)
  • Serrau 24h